អន្តរជាតិ៖ នាយករដ្ឋមន្ត្រីឥណ្ឌា លោក Narendra Modi នឹងជួបផ្ទាល់ជាមួយប្រធានាធិបតីអ៊ុយក្រែន លោក Volodymyr Zelenskyy នៅរដ្ឋធានី Kyiv នាថ្ងៃសុក្រ ទី២៣ សីហា ដែលជាដំណើរទស្សនកិច្ចជាប្រវត្តិសាស្ត្រ ដែលគេរំពឹងថានាយករដ្ឋមន្រ្តីឥណ្ឌារូបនេះនឹងជួយជំរុញឱ្យមានដំណោះស្រាយមួយ ដើម្បីបញ្ចប់សង្រ្គាមរវាងរុស្ស៊ី និងអ៊ុយក្រែន។
នៅក្នុងដំណើរទស្សនកិច្ចនេះ លោក Narendra Modi នឹងព្យាយាមប្រកាន់យកជំហរជាអ្នកចរចាឱ្យមានសន្តិភាពឡើងវិញ បន្ទាប់ពីប្រទេសទាំងពីរបានវាយប្រហារគ្នាទៅវិញទៅមក នៅក្នុងសង្គ្រាមដែលបានអូសបន្លាយពេលជាងពីរឆ្នាំកន្លះកន្លងមកនេះ។ លោក Modi បានថ្លែងនៅមុនដំណើរទស្សនកិច្ចរបស់លោកថា៖ "គ្មានបញ្ហាណាអាចត្រូវបានដោះស្រាយនៅក្នុងសមរភូមិនោះទេ" ដោយលោកបានបន្ថែមថា ឥណ្ឌាគាំទ្រឱ្យមានកិច្ចសន្ទនា និងការទូតសម្រាប់ការស្ដារសន្តិភាព និងស្ថិរភាពឲ្យបានឆាប់បំផុតតាមដែលអាចធ្វើទៅបាន។
គួរបញ្ជាក់ថា លោក Narendra Modi គឺជានាយករដ្ឋមន្ត្រីឥណ្ឌាដំបូងគេបង្អស់ដែលបានធ្វើទស្សនកិច្ចទៅកាន់ប្រទេសអ៊ុយក្រែន។ ដំណើរទស្សនកិច្ចរបស់នាយករដ្ឋមន្រ្តីឥណ្ឌានេះធ្វើឡើងប្រហែល ៦សប្តាហ៍ប៉ុណ្ណោះ បន្ទាប់ពីលោកបានទៅបំពេញទស្សនកិច្ចទៅកាន់ប្រទេសរុស្ស៊ីដើម្បីពិភាក្សាអំពីស្ថានការណ៍ជម្លោះនៅក្នុងប្រទេសអ៊ុយក្រែន។
ការិយាល័យអគ្គលេខាធិការអង្គការសហប្រជាជាតិបានបង្ហាញក្ដីសង្ឃឹមថា ដំណើរទស្សនកិច្ចរបស់នាយករដ្ឋមន្ត្រីឥណ្ឌាទៅកាន់អ៊ុយក្រែនអាចនាំមកនូវលទ្ធភាពនៃការបញ្ចប់សង្គ្រាមដែលកំពុងអូសបន្លាយនេះ។ ទោះបីជាកន្លងមក ឥណ្ឌាមិនទាន់ថ្កោលទោសការឈ្លានពានរបស់រុស្ស៊ីទៅលើអ៊ុយក្រែនក៏ដោយ ក៏សេចក្តីថ្លែងការណ៍របស់នាយករដ្ឋមន្ត្រី Modi ធ្លាប់បញ្ជាក់ថា "ក្នុងនាមជាមិត្ត និងជាដៃគូ (ជាមួយរុស្សី) យើងសង្ឃឹមយ៉ាងមុតមាំសម្រាប់ការត្រឡប់មកវិញនូវសន្តិភាព និងស្ថិរភាពនៅក្នុងតំបន់ឱ្យបានឆាប់រហ័ស"។
សូមបញ្ជាក់ថា លោក Narendra Modi ក៏ទើបតែបញ្ចប់ដំណើរទស្សនកិច្ចនៅប្រទេសប៉ូឡូញផងដែរ មុនបន្តដំណើរមកកាន់ប្រទេសអ៊ុយក្រែន។ អ្នកនាំពាក្យផ្លូវការនៃក្រសួងការបរទេសឥណ្ឌាលោក Randhir Jaiswal ថ្លែងថា ដំណើរទស្សនកិច្ចរបស់នាយករដ្ឋមន្ត្រី Modi ទៅកាន់ប្រទេសប៉ូឡូញនឹងពង្រីកនិងធ្វើឱ្យទំនាក់ទំនងឥណ្ឌា-ប៉ូឡូញកាន់តែស៊ីជម្រៅបន្ថែមទៀត៕
